महाराष्ट्रात सध्या हवामानाचे दोन अत्यंत टोकाचे रंग पाहायला मिळत आहेत. एकीकडे विदर्भ उन्हाच्या तीव्र झळांनी अक्षरशः होरपळत आहे, तर दुसरीकडे पश्चिम महाराष्ट्र आणि कोकणावर पावसाचे ढग दाटून आले आहेत. विदर्भातील अकोला, अमरावती, वर्धा आणि यवतमाळ जिल्ह्यांसाठी हवामान विभागानं रेड अलर्ट जारी केला आहे. चंद्रपूर जिल्ह्यातील ब्रह्मपुरी याठिकाणी रविवारी देशातील सर्वाधिक म्हणजे तब्बल 47.2 अंश सेल्सिअस तापमानाची नोंद झाली आहे. दरम्यान नागपूर आणि चंद्रपूरसाठी ऑरेंज अलर्ट जारी करण्यात आला आहे आणि पुढील 4 ते 5 दिवस हीच स्थिती कायम राहण्याचा अंदाज व्यक्त करण्यात आला आहे.