मुंबई : आगामी विधानसभेसाठी उद्धव ठाकरेंनी चांगली कंबर कसली आहे. विधानसभा निवडणुकीच्या पार्श्वभूमीवर उद्धव ठाकरे अलर्ट मोडवर आले आहेत. मुंबईतील ३६ विधानसभांच्या मोर्चेबांधणीसाठी उद्धव ठाकरे यांनी बैठक घेतली आहे. दरम्यान मुंबईतील ३६ मतदारसंघांची जबाबदारी पक्षाचे १८ नेते आणि १८ सहायकांवर सोपविण्यात आल्याची माहिती मिळतेय.

या सहायकांना येत्या काही दिवसांत ३६ मतदारसंघांचा अहवाल उद्धव ठाकरे यांना सादर करावा लागणार आहे. तसे आदेश उद्धव ठाकरे यांनी पदाधिकाऱ्यांना दिले आहेत. मुंबईसह राज्यातील इतर मतदारसंघांचे सर्वेक्षण अहवाल २५ ऑगस्ट रोजी उद्धव ठाकरेंकडे सादर केले जाणार आहेत. महाविकास आघाडीचे जागावाटप अद्याप बाकी आहे. परंतु उद्धव ठाकरे अतिशय गंभीरपणे विधानसभेच्या तयारीमध्ये लागल्याचं दिसतंय. यंदा महाविकास आघाडी आणि महायुतीत चुरशीची निवडणूक होण्याची शक्यता आहे.