आगामी विधानसभा निवडणुकांचे पडघम वाजू लागले आहेत. सर्वच पक्षांनी तयारी सुरू केली आहे. तर सत्ताधारी महायुती आणि विरोधी पक्षांच्या महाविकास आघाडीकडून जागावाटपांबाबत प्राथमिक पातळीवर चर्चा देखील सुरू केली आहे. अशात आता महाविकास आघाडीची सत्ता आली तर, मुख्यमंत्री कोण होणार, अशा चर्चांना उधाण आलं आहे. याबाबत पृथ्वीराज चव्हाणांनी वक्तव्य केल्यानंतर त्याला राष्ट्रवादी काँग्रेस शरदचंद्र पवार पक्षाचे प्रमुख शरद पवार यांनी दुजोरा दिला आहे. ज्यांचे जास्त आमदार त्यांचा मुख्यमंत्री असेल, असं विधान पृथ्वीराज चव्हाण यांनी केलं होतं. त्यावर पृथ्वीराज चव्हाण यांचं मत दुर्लक्षित करण्यासारखं नाही, असं पवार म्हणाले.

महाविकास आघाडीचा मुख्यमंत्रि‍पदाचा चेहरा कोण याबाबत वेगवेगळे तर्क लढवले जात आहेत. खासदार संजय राऊत यांच्याकडून सातत्याने उद्धव ठाकरे हे मुख्यमंत्रि‍पदाचा चेहरा असतील, असा दावा केला जात होता. उद्धव ठाकरे यांच्या दिल्ली दौऱ्यानंतर त्याबाबत अधिक चर्चा होऊ लागली होती. आता पृथ्वीराज चव्हाण यांच्या विधानावर स्वतः शरद पवार यांनी दिलेली प्रतिक्रिया महत्वाची मानली जात आहे.