मुंबई : कोरेगावचे शिवसेनेचे आमदार महेश शिंदे यांचा सध्या एक व्हिडीओ व्हायरल होतोय. या व्हिडिओमधील शिंदे यांच्या विधानाने अनेकांच्या भुवया उंचावल्या आहेत. शिवसेनेचे आमदार महेश शिंदे यांनी लाडकी बहीण योजनेविषयी चुकीची माहिती पसरवणाऱ्यांना चांगलाच दम भरलाय. कोरेगाव भागात व्हॉट्सअप ग्रुपमध्ये एका व्यक्तीनं आम्हाला नको तुमचे पंधराशे रुपये, आम्हाला मराठा आरक्षण द्या असा मेसेज केला होता.

त्यानंतर शिंदे गटाचे आमदार महेश शिंदे यांनी त्या व्यक्तीला फोन केला. तुला ही योजना नको असेल, तर तुझं नाव यातून डिलीट करतो असं सुनावले. यावेळी शिंदे यांनी मी कोरेगावचा आमदार आहे. कोणत्याही गावातील कानाकोपऱ्यातील लोकांना ओळखतो. डिसेंबरमध्ये स्क्रुटिणी कमिटीची बैठक होणार आहे. यात कोण पात्र, कोण अपात्र हे ठरणार आहे. यामुळं या निवडणुतीत कोण पुढं पुढं करतोय, याची यादी काढा. मग त्यांचा करेक्ट कार्यक्रम करूया, असं विधान केलंय. त्यामुळे राजकीय वर्तुळात शिंदे यांच्या विधानामुळे अनेकांच्या भुवया उंचावल्या आहेत.