राज ठाकरे यांचे अतिशय कट्टर समर्थक प्रकाश महाजन हे मागच्या काही दिवसांपासून मनसेमध्ये नाराज होते आणि त्यामुळे त्यांनी पक्षाचा राजीनामा देखील दिला होता. त्यानंतर महाजन काय निर्णय घेतात याकडे सर्वांचे लक्ष लागले होते. पण अखेर त्यांनी आज उपमुख्यमंत्री एकनाथ शिंदे यांच्या शिवसेनेत प्रवेश केला आहे. काल बुधवारी (दि,25) त्यांनी शिंदेंची भेट घेतली होती आणि शिवसेनेत येण्याची इच्छा व्यक्त केली आणि आज अखेर त्यांनी धनुष्यबाण हाती घेतले. ऐन निवडणुकांच्या तोंडावर शिंदेसेनेत प्रवेश केल्याने सर्वांच्याच भुवया उंचावल्या आहेत. हा प्रवेश सोहळा कोणत्याही गाजावाजाविना पार पडला. या राजकीय घडामोडीमुळे आगामी निवडणुकांवर काय परिणाम होणार, हे पाहणे महत्त्वाचे ठरणार आहे.