उपमुख्यमंत्री एकनाथ शिंदेंच्या ऑपरेशन टायगरने उद्धव ठाकरे यांना मोठा धक्का दिला. एकनाथ शिंदे यांनी उद्धव ठाकरे यांच्या ९ खासदारांपैकी ६ खासदारांना फोडल्याची चर्चा सुरू आहे. हे सर्व खासदार शिंदेंसोबत जाणार असून त्यांना दिल्लीतून दुसऱ्या राज्यात हलवण्यात आल्याची माहिती सुत्रांनी दिली. आता उद्याच्या ठाकरेसेनेच्या बैठकीत किती खासदार आणि कोणते खासदार येतात यानंतरच ठाकरेसेना पुढील भूमिका मांडणार आहे. शिंदेसेनेसोबत ६ खासदार नसल्याचा ठाकरेसेनेला विश्वास असल्याची सूत्रांची माहिती आहे. त्यामुळे उद्याच्या बैठकीत नेमके कोणते खासदार येतात त्यावर ऑपरेशन टायगर यशस्वी की अयशस्वी हे ठरणार आहे.

पण ठाकरेंच्या ९ खासदारांपैकी अनिल देसाई आणि अरविंद सावंत हे दोन खासदार हे पक्षासोबतच कायम राहणार आहेत. त्यानंतर ज्या ६ खासदारांची शिंदेंसोबत जाण्याची चर्चा सुरू होती त्यापैकी दोन खासदारांनी ठाकरेंसोबत राहणार असल्याचे सांगितले. खासदार राजाभाऊ वाजे आणि संजय दिना पाटील यांनी आपण कोणत्याही पक्षात जाण नसल्याचे माध्यमांसोबत सांगितल्यामुळे शिंदेंचे ऑपरेशन टायगर यशस्वी होतेय की नाही हे पाहणं महत्वाचे राहिल.