सिंधुदुर्ग जिल्ह्यातील कणकवली नगरपंचायतीच्या निवडणुकीच्या पार्श्वभूमीवर ठाकरे आणि शिंदे या दोघांची शिवसेना एकत्र येण्याची चर्चा काल(शुक्रवारी) दिवसभर सुरू होती. शहर विकास आघाडी या नावाने दोन्ही गट एकत्र येऊन निवडणूक लढवण्याची चर्चा सुरू असतानाच आता यावर भाजपचे खासदार नारायण राणे यांनी एकनाथ शिंदे यांना गंभीर इशारा दिला आहे. ही युती होण्यासाठी कणकवली शहरात गुप्त बैठक देखील झाली होती. या बैठकीला माजी आमदार वैभव नाईक, माजी आमदार राजन तेली, तसेच सुशांत नाईक, संदेश पारकर आणि सतीश सावंत हे स्थानिक पदाधिकारी उपस्थित होते. याची माहिती समजताच आता नारायण राणे यांनी पत्रकार परिषद घेत यावर भाष्य केले. राणे म्हणाले, असे झाले तर एकनाथ शिंदे शिवसेनेचे रत्नागिरी आणि सिंधुदुर्ग जिल्ह्यात आम्ही संबंध तोडून टाकू, विशाल परब आणि राजन तेल यांना मी मानत नाही. मी त्यांना नेहमी विरोध करीन. प्रतिष्ठित नागरिकांमध्ये राजन तेली बसत नाही. सर्वांनी टाकून दिलेले एकनाथ शिंदे का जमा करतोय? असा निशाणा राणे यांनी राजन तेली यांच्या शिंदे गटातील प्रवेशावरून केला.