Congress Decides Against Alliance With MNS for Upcoming Local Body Elections : आगामी स्थानिक स्वराज्य संस्थांच्या निवडणुकीसंदर्भात काँग्रेसने मोठा निर्णय घेतला आहे. काँग्रेसने मनसे सोबत युती न करण्यावर ठाम भूमिका घेतली आहे. काँग्रेस नेते आणि पदाधिकाऱ्यांच्या मुंबईतील टिळक भवन येथे झालेल्या बैठकीत हा महत्त्वपूर्ण निर्णय घेण्यात आला. या बैठकीत 'इंडिया आघाडीत असलेल्या पक्षांसोबतच युती केली जाईल,' यावर सर्व नेत्यांचे एकमत झाले. त्यामुळे आगामी काळात होणाऱ्या निवडणुकांमध्ये काँग्रेस स्वबळावर लढणार की इंडिया आघाडीतील मित्रपक्षांना सोबत घेणार हे पाहणे महत्त्वाचे ठरणार आहे, पण मनसेसोबत युतीची शक्यता पूर्णपणे फेटाळण्यात आली आहे. हा निर्णय लवकरच दिल्लीतील पक्षश्रेष्ठींपर्यंत पोहोचवला जाणार असल्याचेही सांगण्यात आले. काँग्रेसने मनसेसोबत न जाण्याचा निर्णय घेतल्यानंतर उद्धव ठाकरे यांच्या भूमिकेकडे लक्ष लागेल आहे. ठाकरे काय निर्णय घेणार? उद्धव ठाकरे भावासोबत जाणार की काँग्रेससोबत? याबाबत चर्चा सुरू झाल्या आहेत.