राष्ट्रवादी कॉँग्रेस पक्षात फुट पडल्याने पवार कुटुंबामध्ये देखील काहीकाळ दरी निर्माण झाली होती. लोकसभा निवडणुकीच्या वेळेसही सुप्रिया सुळे विरुद्ध सुनेत्रा पवार या नणंद भाऊजाई एकमेकांच्या विरोधात निवडणुकीच्या रणसंग्रामात उभ्या होत्या. विधानसभा निवडणुकीतसुद्धा अजित पवार यांच्या विरोधात युगेंद्र पवार हे उभे होते. त्यानंतर पवार कुटुंब हे काहीसे दुरावल्याचे पाहायला मिळाले.

मात्र, अजित पवार यांच्या मुलाच्या साखरपुड्याच्यावेळेस सर्व पवार कुटुंब हे एकत्र आले. त्यानंतर देखील अनेकवेळा अजित पवार आणि शरद पवार हे बैठकीत दिसून आल्याने सर्वांच्याच राजकीय भुवया उंचवल्या होत्या. दोन्ही राष्ट्रवादी एकत्र येणार का? असा सवाल आज अजित पवार यांना विचारला असता अजित पवार म्हणाले, अशा बातम्या मी माध्यमांमध्ये बघतो आहे. ते सूत्र कोण आहे हे मला बघायचे आहे अशी मिश्किल प्रतिक्रिया अजित पवार यांनी दिली.