लाडकी बहीण योजनेतील लाभार्थी महिलांसाठी दिलासादायक बातमी समोर आली आहे. ई-केवायसी प्रक्रियेत तांत्रिक व मानवी चुका झाल्यामुळे हजारो महिलांना डिसेंबर महिन्याचे १५०० रुपये अद्याप मिळालेले नाहीत. ही बाब लक्षात घेत शासनाकडून ई-केवायसीसाठी पुन्हा एकदा मुदतवाढ देण्याची शक्यता वर्तवली जात आहे.

३१ डिसेंबर ही ई-केवायसीसाठी अंतिम मुदत होती. मात्र या प्रक्रियेदरम्यान अनेक महिलांनी चुकून ‘शासकीय नोकरदार’ या पर्यायावर क्लिक केल्याने त्या अपात्र ठरल्या आणि त्यांचा लाभ तात्पुरता बंद झाला. प्रत्यक्षात या महिला शासकीय सेवेत नसतानाही केवळ एका चुकीच्या क्लिकमुळे त्यांना योजनेचा लाभ मिळालेला नाही.

या पार्श्वभूमीवर शासनाने महत्त्वाचा निर्णय घेण्याची तयारी सुरू केली आहे. सूत्रांकडून मिळालेल्या माहितीनुसार, संबंधित महिलांची अंगणवाडी सेविकांमार्फत घरोघरी जाऊन फेरपडताळणी करण्यात येणार आहे. या पडताळणीनंतर पात्र महिलांना ई-केवायसीमध्ये दुरुस्ती करण्याची स्वतंत्र संधी दिली जाणार आहे.