Ahilyanagar md drugs case police constable arrested : अहिल्यानगरमध्ये पोलिस दलाला काळिमा फासणारी धक्कादायक घटना समोर आली आहे. स्थानिक गुन्हे शाखेचा पोलीस कर्मचारी श्यामसुंदर गुरव याला एमडी (मेफेड्रोन) ड्रग्स चोरून विकल्याप्रकरणी अटक करण्यात आली आहे. श्रीरामपूर येथे जप्त केलेल्या दोन कोटी दहा लाख रुपयांच्या १ किलो ५२ ग्रॅम एमडी ड्रग्सऐवजी पोलिस कस्टडीत चक्क पीठ ठेवण्यात आल्याचं उघड झालं आहे. हा नशेचा साठा शिरूर येथे विक्रीसाठी दिल्याचा आरोप आहे. या प्रकरणात पारनेर येथील ज्ञानदेव उर्फ माऊली बाळू शिंदे याच्यावरही दोन कोटी रुपयांच्या ड्रग्स विक्रीप्रकरणी गुन्हा दाखल करण्यात आला आहे. ज्ञानदेव शिंदे हा खासदार निलेश लंके यांचा जवळचा कार्यकर्ता असल्याची माहिती समोर आल्याने राजकीय वर्तुळात खळबळ उडाली आहे. सोशल मीडियावर निलेश लंके आणि त्यांच्या पत्नींसोबतचे फोटो व्हायरल होत असून, या प्रकरणात राजकीय वरदहस्त आहे का, असा सवाल उपस्थित केला जात आहे. माजी खासदार सुजय विखे पाटील यांच्या आरोपांना आता पुष्टी मिळतेय का, याकडेही लक्ष लागलं आहे.