मुंबई : राज्यात नोव्हेंबरमध्ये विधानसभा निवडणुका होण्याची शक्यता आहे. परंतु अजून अधिकृतपणे महाविकास आघाडी आणि महायुतीने जागावाटपाची यादी जाहीर केलेली नाही. विधानसभा निवडणुकीच्या जागावाटपाचा फॉर्म्युला ठरविण्याच्या पार्श्वभूमीवर महायुती आणि महाविकास आघाडीच्या बैठका देखील सुरू झाल्यात. परंतु अंतिम फॉर्म्युला लगेच जाहीर होणार नसल्याचं समोर जातंय. पितृपक्ष संपल्यानंतर नवरात्र उत्सवाच्या काळात त्याची घोषणा होण्याची शक्यता आहे.

पितृपक्षाला आता १८ सप्टेंबरपासून सुरुवात होत आहे. पितृपक्ष २ ऑक्टोबरपर्यंत असेल. पितृपक्षामध्ये कोणताही शुभ निर्णय करू नये, अशी धारणा असल्याचं मानलं जातंय. अनेकदा राजकीय पक्षांनी याचं पालन देखील केलंय. यापूर्वी देखील असं निदर्शनास आलंय. आमची चर्चा सुरू आहे. पितृपक्ष झाल्यानंतरच जागावाटपाचा फॉर्म्युला जाहीर करू, असे दोन्ही बाजूंचे नेते सांगत असल्याचं दिसतंय. नवरात्रोत्सवात जागावाटपाची यादी जाहीर होईल, अशी शक्यता आहे.