महाड नगरपालिकेच्या निवडणुकीदरम्यान शिवसेना आणि राष्ट्रवादी काँग्रेस यांच्यात झालेल्या राडा प्रकरणात मोठी घडामोड समोर आली आहे. शिवसेनेचे नेते तथा मंत्री भरत गोगावले यांचा मुलगा विकास गोगावले यांनी आत्मसमर्पण केल्यानंतर राष्ट्रवादी काँग्रेसच्या आरोपींनीही महाड तालुका पोलीस ठाण्यात स्वतःला समर्पण केले आहे.

विकास गोगावले यांच्यासह शिवसेनेच्या सात जणांनी सकाळी महाड शहर पोलीस ठाण्यात शरणागती पत्करली होती. त्यानंतर सुमारे पाच तासांनी राष्ट्रवादी काँग्रेसच्या आरोपींनीही पोलीस ठाण्यात हजर होत आत्मसमर्पण केल्याची माहिती समोर आली आहे.

महाड नगरपालिकेच्या निवडणुकीच्या काळात शिवसेना आणि राष्ट्रवादी काँग्रेसच्या कार्यकर्त्यांमध्ये तणाव निर्माण होऊन राडा झाला होता. या प्रकरणात दोन्ही बाजूंनी परस्परविरोधी गुन्हे दाखल करण्यात आले होते. अटक टाळण्यासाठी दोन्ही पक्षांच्या कार्यकर्त्यांनी न्यायालयात अटकपूर्व जामिनासाठी धाव घेतली होती.