मुंबईत घरांच्या किंमती गगनाला भिडल्या असतानाच एका फ्लॅटसाठी कोट्यवधींचा भाडेकरार झालाय. मुंबईतील वरळीत एका फ्लॅटसाठी तब्बल १८ कोटी रुपयांचा भाडेकरार करण्यात आला आहे. वरळीतील थ्री सिक्स्टी वेस्ट इमारतीतील या फ्लॅटचं महिन्याचं भाडं २७ ते ३३ लाख रुपये इतकं असून, पाच वर्षांसाठी १८.०३ कोटी रुपयांचा भाडेकरार करण्यात आला आहे. कोल्हापूरमधील एसजीजी व्हेंचर्स एलएलपीने वरळीतील 'थ्री सिक्स्टी वेस्ट'च्या टॉवर बीमधील २२ व्या मजल्यावरचा ६८३१ चौरस फुटांचा आलिशान फ्लॅट भाड्याने घेतला आहे. या करारासाठी १.६५ कोटी रुपयांची सुरक्षा ठेव भरण्यात आली असून, ४.७३ लाख रुपयांचं मुद्रांक शुल्क भरण्यात आलं आहे.