मराठा समाजाला ओबीसी प्रवर्गातून आरक्षण देण्यास विरोध करणारे लक्ष्मण हाके पुन्हा एकदा चर्चेत आले आहेत. लक्ष्मण हाके यांचा एक व्हिडीओ सध्या सोशल मीडियावर तुफान व्हायरल होत आहे. या व्हिडीओमध्ये मराठा आंदोलकांनी हाकेंना घेराव घातल्याचं दिसून येत आहे. हाके दारूच्या नशेत टुल्ल असून त्यांना धड चालताही येत नाही, असा आरोप मराठा आंदोलकांनी केला आहे.

पुण्यातील कोंढावा परिसरात हा राडा झाल्याचं कळतंय. या व्हिडीओमध्ये मराठा आंदोलकांच्या गर्दीत लक्ष्मण हाके गोंधळलेल्या अवस्थेत चालत असल्याचं दिसून येत आहे. दुसरीकडे हाके यांनी मात्र आपण मद्यपान केलं नसल्याचं म्हटलं आहे. माझी वैदयकीय तपासणी करावी असं म्हणताना हाकेंनी आपण कुठेही पळून गेलेलो नाही असंही म्हटलं आहे.

हाके यांनी मराठा आंदोलकांचे आरोप फेटाळून लावत, "उलट माझ्याच जीवाला धोका आहे," असा आरोप केला आहे. दुसरीकडे दारूच्या नशेत हाकेंनी धिंगाणा घातल आपल्याला शिवीगाळ केल्याचा आरोप मराठा आंदोलकांनी केला आहे. याप्रकरणी दोन्ही बाजूंची पोलिसांत तक्रार दाखल करण्यात आल्या आहेत.