मुंबईकरांचे आणि जगाच्या कानाकोपऱ्यात असलेल्या करोडे गणेशभक्तांची 'लालबागचा राजा'च्या पहिल्या दर्शनाची उत्सुकता शिगेला पोहोचली होती. यंदाच्या गणेशोत्सवापूर्वी आज (शुक्रवार, 11 सप्टेंबर) ला सायंकाळी 7 वाजता लालबागचा राजाची पहिली झलक अधिकृतपणे जाहीर केली. परळ येथील लालबाग मार्केट परिसरातील मंडपात लालबागचा राजा सार्वजनिक गणेशोत्सव मंडळाच्या वतीने बाप्पाचे मुखदर्शन घडवण्यात आले. यावेळी बाप्पाच्या दर्शनासाठी मोठ्या संख्येने गणेशभक्तांनी गर्दी केली होती.

तिरुपती बालाजी, महाकाल मंदिरावर आधारित देखावा

यंदाच्या लालबागच्या राजाचा देखावा तिरुपती बालाजी आणि उज्जैनच्या महाकाल मंदिराच्या संकल्पनेवर आधारित आहे. बाप्पाच्या मूर्तीवर यंदा विशेष धार्मिक अलंकार करण्यात आले आहेत. गणेशराजाच्या कपाळावर त्रिशूल असून गळ्यात मोठा पट्टा घालण्यात आला आहे. या पट्ट्यावरही त्रिशूल आणि डमरूची आकर्षक नक्षी करण्यात आली आहे. त्यामुळे लालबागच्या राजाचे रूप अधिकच भव्य आणि आकर्षक दिसत आहे.