कोल्हापुरातील करवीर तालुक्यातील वडणगे गावात एक संतापजनक घटना घडली आहे. शिवजयंतीच्या पूर्वसंध्येला छत्रपती शिवाजी महाराज यांच्या पुतळ्यासमोर स्टेज उभारत तेथे अश्लील नृत्य कार्यक्रम आयोजित करण्यात आला. या अश्लील डान्सचे व्हिडिओ सोशल मीडियावर व्हायरल झालेत. आज शिवजयंतीचा उत्सव असताना आणि गावात महाशिवरात्रीनिमित्त उत्साहाचे वातावरण आहे. या काळात भजन, कीर्तन किंवा सांस्कृतिक कार्यक्रम आयोजित केले जातात, असा अश्लील डान्सचा कार्यक्रम आयोजित करण्यात आल्याने शिवप्रेमींनी संताप व्यक्त केलाय. प्रकारचा नृत्य कार्यक्रम का ठेवला, असा सवाल शिवप्रेमींकडून उपस्थित केला जातोय. या आधीही बेकायदा बैलगाडी शर्यती प्रकरणी ग्रामपंचायत पदाधिकाऱ्यांवर गुन्हे दाखल झाले होते. त्यामुळे पुन्हा एकदा ग्रामपंचायतीच्या कारभारावर प्रश्नचिन्ह निर्माण झाले आहे. वडणगे ग्रामपंचायतीकडून महापुरुषांचा अवमान झाल्याचा आरोप शिवप्रेमींनी केलाय. छत्रपती शिवाजी महाराजांच्या पुतळ्यासमोर पडदा लावून असा कार्यक्रम घेणे कितपत योग्य आहे, असा सवाल ग्रामस्थांकडून केला जातोय.