कांदिवली रेल्वे स्थानकात तिकीट तपासणीवरून महिला तिकीट टीसी आणि महिला प्रवाशामध्ये वाद झाल्याची घटना समोर आली आहे. या वादानंतर स्थानकात गोंधळाचे वातावरण निर्माण झाले. घटनेची माहिती मिळताच लोहमार्ग पोलीस आणि रेल्वे सुरक्षा दल (आरपीएफ) यांनी गर्दीवर नियंत्रण मिळवण्याचे प्रयत्न सुरू केले.

मिळालेल्या माहितीनुसार, महिला टीसीने प्रवासी महिलेकडे तिकीटाची मागणी केली. त्यानंतर संबंधित महिलेने तेथून पळण्याचा प्रयत्न केल्याची माहिती आहे. यावेळी महिला टीसीने तिचा पाठलाग केला. या पाठलागादरम्यान प्रवासी महिला पडली असून, तिचे कपडे फाटल्याची माहिती समोर आली आहे.

याप्रकरणी रेल्वे पोलिसांनी माहिती दिली की, सदर प्रवाशी महिला ही विना तिकीट प्रवास करत होती. त्यावेळी महिला टीसीनं त्यांच्याकडे तिकीटची विचारणा केली. परंतु आता दंड भरावे लागेल, या भीतीने महिला प्रवाशी पळून लागली. त्यावेळी टीसीनं दंड वसूल करण्यासाठी त्यांचा पाठलाग केला.त्यावेळी त्या खाली पडल्या. दरम्यान विनातिकीट कोणी प्रवास करू नये, असा सल्लाही पोलीस अधिकाऱ्यांनी यावेळी दिली.

या घटनेनंतर स्थानकात मोठ्या संख्येने प्रवासी जमा झाले. त्यामुळे परिसरात गोंधळाची परिस्थिती निर्माण झाली. महिला टीसीने माफी मागावी, अशी मागणी काही प्रवाशांकडून करण्यात आल्याची माहिती आहे. दरम्यान, प्रवाशांची गर्दी वाढल्याने कांदिवली रेल्वे स्थानकात तणावपूर्ण वातावरण निर्माण झाले. परिस्थिती नियंत्रणात आणण्यासाठी लोहमार्ग पोलीस आणि आरपीएफकडून प्रयत्न करण्यात आले.