संघर्ष गांगुर्डे, साम टीव्ही

कल्याण शहरातील स्वर्गीय आनंद दिघे पुलाचे उद्घाटन कोण करणार यावरून आज शिवसेना आणि भाजप मधील राजकीय वातावरण चांगलेच तापले. आज सकाळी भाजप आमदार सुलभा गायकवाड यांनी पुलाची पाहणी करून संध्याकाळी पूल खुला होणार असे सांगितले होते. भाजपकडून आज संध्याकाळी पाच वाजता पुलाचे अधिकृत उद्घाटन होणार होते. मात्र, त्यापूर्वीच शिवसेनेने अचानक कृती करत पूल वाहतुकीसाठी खुला केल्याची घोषणा केली. त्यामुळे पूल आज दुपारीच नागरिकांसाठी खुला करण्यात आला.

यावर शिवसेनेने स्पष्ट भूमिका घेतली की, हे श्रेयासाठी केलेले काम नाही. नागरिकांची गैरसोय होऊ नये म्हणून पूल तत्काळ सुरू केला,असे शहर संपर्क प्रमुख महेश गायकवाड आणि शहर प्रमुख निलेश शिंदे यांनी सांगितले. दुसरीकडे भाजपकडून अधिकृत उद्‌घाटनाची तयारी सुरू होती. अचानक घडलेल्या या घडामोडीनंतर दोन्ही पक्षांमध्ये श्रेयवादाची लढाई अधिकच चिघळली असून राजकीय वातावरण तापण्याची चिन्हे आहेत.

स्थानिक नागरिक मात्र पूल सुरू झाल्यामुळे दिलासा व्यक्त करत आहेत, तर राजकीय रंग चढलेल्या या प्रकाराची जोरदार चर्चा शहरभर आहे.