जालन्यातील सामनगाव रोड परिसरात एक धक्कादायक घटना समोर आली आहे. जमिनीतून अचानक ज्वलनशील पदार्थ बाहेर पडत असल्याने नागरिकांमध्ये भीतीचे वातावरण निर्माण झाले आहे. या घटनेचा व्हिडिओ सध्या सोशल मीडियावर मोठ्या प्रमाणात व्हायरल होत असून परिसरात एकच खळबळ उडाली आहे. जमिनीतून ज्वाला बाहेर येत असल्यामुळे ही ज्वालामुखी तर नाही ना अशी चर्चा सध्या सुरू आहे.

मिळालेल्या माहितीनुसार, संबंधित ठिकाणी जमिनीतून काळ्या रंगाचे ज्वलनशील पदार्थ अचानक बाहेर फेकले जात असल्याने नागरिकांमध्ये भीती पसरली आहे. दरम्यान खडकाळ जमिनीमुळे आणि पोलमधून जमिनीत जाणाऱ्या विद्युत प्रवाहामुळे जमिनीतून लाव्ह्यासारखे वितळलेले खडक बाहेर येताना दिसल्याचा अंदाज व्यक्त केला जात आहे. वाफा आणि काही तरी जळत असल्यासारखा पदार्थ बाहेर येत असल्याचे नागरिक सांगत आहे. या घटनेची माहिती मिळताच नागरिकांनी घटनास्थळी मोठी गर्दी केली आहे.