नवी दिल्ली : सुप्रीम कोर्टानं निवडणूक आयोगाला एक नोटिस बजावली आहे. सूरत लोकसभा निवडणुकीच्या पार्श्वभूमीवर सुप्रीम कोर्टाने निवडणूक आयोगाला एक विचारणा केली आहे. उमेदवारांपेक्षा नोटाला जास्त मतं मिळाली, तर त्याठिकाणी नव्यानं मतदान घ्यावं का? अशी विचारणा सुप्रीम कोर्टाने निवडणूक आयोगाला केली आहे. सूरतमध्ये निवडणूक बिनविरोध होण्याची परिस्थिती टाळण्यासाठी याचिका दाखल करण्यात आली होती. त्या याचिकेवरुन सुप्रीम कोर्टानं आता निवडणूक आयोगाला विचारणा केली आहे. तशी नोटीसही आयोगाला सुप्रीम कोर्टाकडून पाठवण्यात आली आहे. या नोटिशीला उत्तरादाखल निवडणूक आयोग नेमकी काय भूमिका मांडतं, हे पाहणं महत्त्वाचं ठरणार आहे. कोणताही उमेदवार योग्य न वाटल्यास मतदारांना नोटाला मत देण्याचा पर्याय उपलब्ध असतो. मात्र एकच उमेदवार निवडणुकीच्या रिंगणात असेल, तर अशावेळी निवडणूक बिनविरोध होऊन एका उमेदवाराला बिनविरोधी विजयी करण्याच्या प्रक्रियेवर आता नव्याने विचार केला जातो का? हे पाहणं महत्त्वाचं ठरणार आहे.