स्वातंत्र्यदिनाच्या दिवशी राज्यातील अनेक महापालिकांनी मांस विक्री बंद ठेवण्याच्या निर्णय घेतला. त्यानंतर राज्यात वातावरण चांगलंच तापलं. राज्यातील कल्याण-डोंबिवली, मालेगाव, अमरावती, नाशिक, नागपूर,जळगाव, इचलकरंजी अशा सात महापालिकेच्या आयुक्तांनी आदेश काढत मांस विक्रीचे आदेश जारी केले होते. परंतु यविरोधी पक्षांकडून या निर्णयाचा जोरदार विरोध झाला. खाटीक समाज आणि मांस विक्री करणाऱ्यांनी महापालिकांच्या या निर्णयाला विरोध दर्शवलाय.

आता या विरोधानंतर इचलकरंजी महानगरपालिकेने मांस विक्री बंदीचा आदेश आता मागे घेतलाय. १५ ऑगस्ट रोजी चिकन मटण विक्री सुरू राहणार असल्याचा निर्णय महापालिका प्रशासनाने घेतलाय. महापालिकेनं जनभावना लक्षात घेत हा निर्णय घेतलाय. किमान १५ ऑगस्टच्या रोजी चिकन आणि मटण शॉप चालू ठेवण्यात यावी अशी मागणी काही लोकांनी महापालिकेत केली होती. तर बंदीचा आदेश आल्यापासून जनमाणसात त्याचा विरोध सुरू झाला होता.