छत्रपती संभाजीनगर: शहरासह जिल्ह्यातील ग्रामीण भागात रविवारी सायंकाळच्या सुमारास पावसाने चांगलीच हजेरी लावली आहे. पैठण तालुक्यातील बोकुडजळगाव, पांगरा आणि आसपासच्या परिसरात पावसाने हजेरी लावल्याने शेतात पाणी साचल्याचंही पाहायला मिळालं, तर दुसरीकडे सिल्लोड तालुक्यात देखील मुसळधार पाऊस झाला. सिल्लोडच्या गोळेगाव आणि पानवडोद शिवारात पावसाने जोरदार बॅटिंग केली, यामुळे जुई नदीला जोरदार पुर आला, नदी खळखळून वाहायला लागली आहे. आसपासच्या परिसरातील नदी नाले देखील ओसंडून वाहायला लागल्याने जिकडेतिकडे जलमय परिसर झाला होता. झालेल्या या मुसळधार पावसामुळे पुलावरून पाणी वाहत असल्याने नागरिकांना आपली वाहने जीव धोक्यात घालून बाहेर काढावी लागत असल्याचही दिसून आलं.