Bhaskar Jadhav And Pratap Sarnaik Meet : शिंदेंच्या शिवसेनेकडून राज्यात ऑपरेशन टायगर राबवण्यात येत आहे. विरोधकांच्या महत्त्वाच्या नेत्यांना फोडण्यासाठी शिंदेंकडून प्रयत्न केले जात आहे. उद्धव ठाकरेंच्या शिवसेनेची कोकणातील तोफ अर्थात भास्कार जाधव शिंदेंच्या शिवसेनेत जाणार असल्याच्या चर्चा गेल्या अनेक दिवसांपासून सुरू आहेत. या चर्चेला आता आणखी उत आला. त्याला कारण म्हणजे, नागपूर हिवाळी अधिवेशनावेळी भास्कर जाधव आणि प्रताप सरनाईक यांच्यामध्ये दीर्घ चर्चा झाली. या चर्चेचा व्हिडिओ समोर आल्यानंतर भास्कार जाधव ठाकरेंना सोडणार असल्याच्या चर्चा सुरू झाल्या. (Why Bhaskar Jadhav met Pratap Sarnaik in Nagpur winter session)

भास्कर जाधव आणि परिवहन मंत्री प्रताप सरनाईक यांची विधानभवन परिसरात भेट झाली. यावेळी दोघांमध्ये जवळपास १० ते १५ मिनिट चर्चा झाली. दोघांमध्ये नेमकी चर्चा काय झाली? याबाबत कोणतीही माहिती मिळालेली नाही. पण या भेटीवर प्रश्न विचारला असता ऑपरेशन टायगर सुरूच आहे असं प्रताप सरनाईक यांनी म्हटलं. आम्ही चांगले मित्र आहोत, असेही ते म्हणाले. त्यामुळे भास्कार जाधव यांच्याबाबत पुन्हा एकदा चर्चा सुरू झाली आहे. भास्कर जाधव यांनी याबाबत अद्याप कोणतीही प्रतिक्रिया दिलेली नाही.