सोलापुरात छत्रपती शिवाजी महाराज यांच्या जयंतीनिमित्त मध्यरात्री भव्यदिव्य पाळणा सोहळ्याचे आयोजन करण्यात आले. सोलापूरच्या छत्रपती शिवाजी महाराज चौकात गेल्या चार वर्षांपासून हा सोहळा मोठ्या उत्साहात साजरा केला जात आहे.

यंदाही तोच उत्साह कायम राहिला. विशेष म्हणजे, सीमेवर शहीद झालेल्या वीर जवानांच्या माता आणि पत्नींच्या हस्ते पाळणा हलवण्यात आला, यामुळे सोहळ्याला एक वेगळेच भावनिक आणि स्फूर्तीदायक स्वरूप प्राप्त झाले. महाराष्ट्रासह कर्नाटक, आंध्र प्रदेश आणि तेलंगणा येथून आलेल्या हजारो शिवभक्तांनी या सोहळ्यास उपस्थिती लावली.

पाळणा सोहळ्याच्या निमित्ताने संपूर्ण परिसर जय भवानी, जय शिवाजीच्या घोषणांनी दुमदुमून गेला. शिवप्रेमींच्या उत्साहामुळे या सोहळ्याला एक आगळी वेगळी छटा मिळाली, आणि शिवजयंतीचे हे उत्सवी वातावरण पाहण्यासाठी लोकांनी मोठ्या प्रमाणात गर्दी केली.