धनगर समाजाने शेळ्या - मेंढ्या रखायचं बंद केलं तर जनतेला कुत्र्याचं मटण खावं लागेल, असं वादग्रस्त विधान गोपीचंद पडळकर यांनी केलं आहे. धनगर आरक्षणाच्या मुद्द्यावरून पडळकर यांनी आक्रमक भूमिका घेतली आहे.

राज्यात सगळीकडे धनगर आरक्षणासाठी धनगर समाज आंदोलन करत आहे. मागच्या 15 दिवसापासून लातूरच्या पुण्यश्लोक आहिल्यादेवी होळकर चौकात धनगर समाजाच्या वतीने चंद्रकांत हजारे, तसेच अनिल गोयकर या दोन धनगर आंदोलकांचं आमरण उपोषण सुरू आहे. त्यांच्या या उपोषणाला पाठिंबा देण्यासाठी आज लातूर-अंबाजोगाई महामार्गावर सकल धनगर समाजाच्यावतीने चक्काजाम आंदोलन करण्यात येत आहे. शेळ्या-मेंढ्यासह धनगर समाज आक्रमक झाला आहे. तर गेल्या 4 तासापासून आंदोलकांनी महामार्ग रोखून धरलेला आहे. तात्काळ धनगर समाजाची एसटी प्रवर्गातून आरक्षणाची अंमलबजावणी करा. अन्यथा सरकारला त्यांची जागा दाखवली असा इशाराही आंदोलकांनी यावेळी दिला आहे. याच आंदोलनाच्यावेळी गोपीचंद पडळकर यांनी आक्रमक होत हे वादग्रस्त विधान केलं आहे.