दगडी चाळचे अरुण गवळी यांच्या कन्या आणि माजी नगरसेविका गीता गवळी यांनी भाजपाचे मुंबई अध्यक्ष आणि मंत्री आशिष शेलार यांची नुकतीच भेट घेतली. आगामी मुंबई महापालिका निवडणुकीच्या पार्श्वभूमीवर ही भेट अत्यंत महत्त्वाची मानली जात आहे. लोकसभा निवडणुकीदरम्यान दगडी चाळने महायुतीला सक्रिय पाठिंबा दिला होता.

त्यानंतर आता महापालिका निवडणुकीसाठीही गवळी गट भाजपसोबत हातमिळवणी करणार का, याची उत्सुकता राजकीय वर्तुळात निर्माण झाली आहे. या भेटीत संभाव्य राजकीय समीकरणांवर चर्चा झाल्याची शक्यता वर्तवली जात आहे.भाजपकडून मुंबईतील पारंपरिक मतदारसंघांवर लक्ष केंद्रित करण्यात येत असून, स्थानिक प्रभावशाली गटांशी समन्वय वाढवण्याचे प्रयत्न सुरू आहेत. त्यात गवळी गटाचा पाठिंबा मिळाल्यास युतीला काही ठिकाणी महत्त्वाचे बळ मिळू शकते, असे राजकीय जाणकारांचे म्हणणे आहे.