आपल्या सौंदर्याने आणि नृत्याविष्काराने प्रेक्षकांची मनं जिंकणारी प्रसिद्ध लोकनृत्य कलाकार गौतमी पाटील पुन्हा एकदा चर्चेत आली आहे. मात्र यावेळी कारण तिचं नृत्य नसून तिचा भक्तिरसात तल्लीन झालेला भावनिक व्हिडीओ आहे.सध्या सोशल मीडियावर गौतमी पाटीलचा एक नवा व्हिडीओ मोठ्या प्रमाणावर व्हायरल होत आहे. या व्हिडीओत ती वारकऱ्यांसोबत टाळ वाजवत, हरिनामाच्या गजरात सहभागी होताना दिसत आहे. पारंपरिक पोशाखात, भक्तिमय वातावरणात ती पूर्णपणे हरवून गेल्याचं दृश्य या व्हिडीओत पाहायला मिळत आहे.

वारकऱ्यांच्या गर्दीत सामील होत गौतमीने जणू एक वेगळीच ओळख दाखवली आहे. तिचा हा भक्तिभाव पाहून चाहतेही भारावून गेले आहेत. यावेळी तिने वारकरी परंपरेचा आदर राखत साध्या पोशाखात, टाळ व मृदंगाच्या गजरात सामील होऊन भक्तीचा अनुभव घेतल्याने तिचा हा रूप चाहत्यांसाठी नक्कीच वेगळा ठरत आहे.