शिवसेना शिंदे गटाच्या माजी नगरसेवकाला एका महिलेने भर रस्त्यात मारहाण केल्याची घटना कल्याण येथील अहिल्याबाई चौक परिसरात घडली. या मारहाणीचा व्हिडिओ सोशल मीडियावर जोरदार व्हायरल होत आहे. मोहन उगले असे या माजी नगरसेवकाचे नाव आहे. तर मारहाण करणाऱ्या महिलेचे नाव राणी कपोते असे आहे . रविवारी काँक्रीट रस्त्याच्या भूमिपूजन कार्यक्रम प्रसंगी श्रेयवादावरून या दोघांमध्ये देखील वाद झाल्याचा पाहायला मिळालं होतं. त्यानंतर आज पुन्हा या मारहाणीचा व्हिडिओ व्हायरल झाला आहे. राणी कपोते या शिवसेना शिंदे गटाच्या कार्यकर्ता असल्याची प्राथमिक माहिती आहे.याप्रकरणी शिंदे गटाचे माजी नगरसेवक मोहन उगले यांनी कायद्याने महिलांना संरक्षण आहे. आत्तापर्यंत त्या महिलेला आम्ही काहीच बोललो नाही आणि बोलणार सुद्धा नाही मात्र पक्षाने अशा लोकांवर योग्य ती कारवाई केली पाहिजे अशी मागणी मोहन उगले यांनी केली आहे.