बीडमधील मस्साजोग सरपंच संतोष देशमुख हत्या प्रकरणामुळं अख्खा महाराष्ट्र हादरला होता. या घटनेनंतर आता धुळे जिल्ह्यात माजी सरपंचावर २५ ते ३० जणांच्या टोळक्यानं हल्ला केल्याची घटना धुळे जिल्ह्यात घडलीय. शिंदखेडा तालुक्यातील बाभळे गावचे माजी सरपंच ज्ञानेश्वर पाटील यांच्यावर टोळक्यानं जीवघेणा हल्ला केला.

माजी सरपंचांवरील हल्ल्याची घटना सीसीटीव्ही कॅमेऱ्यात कैद झाली आहे. सरकारी जमिनीवर अतिक्रमण केल्याची तक्रार केल्याचा राग मनात धरून हा हल्ला करण्यात आल्याचे सांगण्यात येत आहे. संतोष देशमुख यांच्यासारखीच माझीही हत्या करण्याचा डाव असल्याचा आरोप ज्ञानेश्वर पाटील यांनी केला. या हल्ल्यात जखमी झालेल्या ज्ञानेश्वर पाटील यांच्यावर सरकारी रुग्णालयात उपचार सुरू आहेत. आरोपींवर कठोर कारवाई करण्यात यावी, अशी मागणी करण्यात आली आहे.