महाराष्ट्रात राहूनही मराठी शिकणार नाही म्हणणाऱ्या उद्योजक सुशील केडिया यांच्या वरळीतील ऑफिसची तोडफोड केल्याप्रकरणी पोलिसांनी पहिलीच मोठी कारवाई केली आहे. तोडफोड करणाऱ्या मनसेच्या पदाधिकाऱ्यांवर गुन्हे दाखल करण्यात आले आहेत. तर वरळी पोलिसांनी पाच कार्यकर्त्यांना ताब्यात घेतलं आहे. महाराष्ट्रात ३० वर्षांपासून राहतोय. पण मी मराठी बोलणार नाही, असं म्हणत राज ठाकरेंना आव्हान देणाऱ्या सुशील केडियांना मनसेच्या कार्यकर्त्यांनी आज, शनिवारी सकाळी जोरदार प्रत्युत्तर दिलं. त्यांच्या वरळीतील ऑफिसची तोडफोड केली. या तोडफोडीच्या घटनेनंतर वरळी पोलिसांनी मनसे पदाधिकाऱ्यांवर कारवाई केली आहे. मनसेच्या पदाधिकाऱ्यांवर गुन्हे नोंदवण्यात आले आहेत.

वरळी पोलिसांनी मनसेच्या आठ ते दहा कार्यकर्त्यांविरोधात गुन्हे दाखल केले आहेत. भारतीय न्याय संहिता कलम 223,189 (2) 189(3), 190, 191(2), 191(3), 125, 324(4) 324(5), 37(1) c आणि 135 अंतर्गत गुन्हे नोंदवले आहेत. तसेच पाच कार्यकर्त्यांना वरळी पोलिसांनी ताब्यात घेतले आहेत.