29 महापालिकेच्या निवडणुकीचे महाराष्ट्रात रणसंग्राम पाहायला मिळत आहे. सगळ्याच पक्षांनी आपली कंबर कसायला सुरुवात केली आहे. एकाच नावाचे दोन दोन पक्ष अशी निवडणूक सध्या पहिल्यांदाच होत असून निरनिराळ्या युत्या आघाड्या निर्माण होताना दिसत आहे. अशातच राज्यात चाललेल्या फोडाफोडीच्या राजकारणाचा भडका थेट घरातच उडालाय. मुंबईच्या वॉर्ड नंबर 138 मध्ये चक्क बाप–लेक आमनेसामने उभे ठाकलेत. मुलगा डॉ. अमोल अंबेकरांना शिंदेसेनेकडून तिकीट मिळालंय, तर बाप महादेव अंबेकरांना ठाकरेंनी उमेदवारी दिलीय. ही लढत म्हणजे कोल्हापुरी मिसळसारखी तिखट झालीय. गल्लीत, चहाच्या टपरीवर, घराघरात ह्याच चर्चेला उधाण आलंय. “कोण जिंकणार?” यावर पैजा लागल्यात. या अनोख्या लढतीमुळं वॉर्डातलं राजकीय वातावरण चांगलंच तापलंय आणि निवडणूक रंगतदार होणार आहे.