कोंढवा परिसरात २ जुलै रोजी एका तरुणीने घरात घुसून डिलिव्हरी बॉयने बलात्कार केल्याची तक्रार पोलिसांकडे दाखल केली होती. या तक्रारीनंतर कोंढवा पोलिसांनी तातडीने तपासाला सुरुवात केली. या प्रकरणाची गंभीर दखल घेत पोलिसांनी ५०० हून अधिक सीसीटीव्ही फुटेज तपासले, तसेच अनेक पोलीस कर्मचारी तैनात करण्यात आले.

मात्र, तपासात धक्कादायक बाब समोर आली आहे. तक्रारदार तरुणीने ज्या व्यक्तीवर आरोप केला होता, तो प्रत्यक्षात डिलिव्हरी बॉय नसून तिचा ओळखीचा मित्र असल्याचे उघड झाले आहे. दोघांनी परस्पर संमतीने एकत्र फोटो काढले होते, हे देखील तपासात निष्पन्न झालं आहे.

या प्रकरणात खोट्या तक्रारीने पोलिसांचा वेळ वाया घालवल्याप्रकरणी संबंधित तरुणीविरुद्ध गुन्हा दाखल करण्यात आला आहे. पोलिसांकडून आता या तरुणीने अशा प्रकारची खोटी तक्रार का केली? तिचा उद्देश काय होता? याचा शोध घेतला जात आहे. पुढील काळात अशा प्रकारच्या खोट्या तक्रारीमुळे पोलिस यंत्रणा आणि प्रशासनाचा वेळ वाया जाऊ नये, म्हणून हा कठोर निर्णय घेण्यात आला आहे.