अमेरिकेतील लॉस एंजलिसच्या वणव्यात हॉलिवूडचा लँडमार्क जळाल्याचे फोटो आणि व्हिडिओ सोशल मीडियावर व्हायरल झाले होते. मात्र, त्यांची पडताळणी केल्यानंतर हे फोटो आणि व्हिडिओ एआय जनरेटेड असल्याचे समोर आले आहे. त्यामुळे लँडमार्क जळून खाक झाल्याचे वृत्त असत्य असल्याचे स्पष्ट झाले आहे.

हॉलिवूड लँडमार्कपासून काही मैल अंतरावर आगीच्या ज्वाळा दिसत होत्या. मात्र, त्यात लँडमार्क जळाला नाही. पुढचे काही दिवस वणवा पसरत राहिला तर लँडमार्कचंही नुकसान होण्याची भीती व्यक्त केली जात आहे.

अमेरिकेच्या कॅलिफोर्नियातील लॉस एंजलिसच्या जंगलात वणवा भडकला होता. या वणव्याची झळ आजूबाजूच्या रहिवासी वस्तीपर्यंत पोहोचली आहे. या आगीत शेकडो घरं जळून खाक झाली आहेत. तर वणवा वेगाने पसरत असून, खबरदारी म्हणून हजारोंच्या संख्येने नागरिकांना सुरक्षितस्थळी नेण्यात आले आहे.