धाराशिव तालुक्यातील कोंबडवाडी गावातील तरुण परमेश्वर मिसाळ याने मराठा आरक्षणासाठी आत्महत्या केली होती. या तरुणाच्या कुटुंबाला भैरवनाथ उद्योग समूहामार्फत माजी मंत्री तानाजी सावंत यांनी तीन लाख रुपयांची थेट मदत दिली आहे. मराठा समाजाच्या आरक्षण लढ्यात आजवर 90 आंदोलकांनी आत्महत्या केली असून त्यांच्या कुटुंबियांना तानाजी सावंत यांनी स्वतःच्या पुढाकाराने आर्थिक मदत दिली आहे. अशा प्रकारे राज्यभरातील आंदोलकांच्या कुटुंबांना दिलेल्या या मदतीमुळे सावंत यांची सामाजिक बांधिलकी अधोरेखित होत आहे. मिसाळ यांच्या कुटुंबीयांनी या मदतीबद्दल कृतज्ञता व्यक्त केली. मात्र, आतापर्यंत केवळ तानाजी सावंत यांच्या माध्यमातूनच मदत मिळाली असून सरकारनेही तातडीने सहाय्य करावे, अशी भावना त्यांनी यावेळी व्यक्त केली.