Student Death : इंजिनियरिंगचे शिक्षण घेणाऱ्या विद्यार्थ्याची आत्महत्या, काॅलेजच्या हॉस्टेलमध्ये गळफास घेत आयुष्य संपवलं

भूषण अहिरे, साम टीव्ही, प्रतिनिधी

Dhule News : धुळे जिल्ह्यातून एक धक्कादायक घटना घडली आहे. धुळ्यातील इंजिनियरिंगचे शिक्षण घेणाऱ्या एका विद्यार्थ्याने आत्महत्या केल्याची माहिती समोर आली आहे. या विद्यार्थ्याने गळफास घेत आयुष्य संपवल्याचे म्हटले जात आहे. तरुणाच्या आत्महत्येच्या बातमीमुळे कॉलेज परिसरात मोठी खळबळ उडाली आहे.

मिळालेल्या माहितीनुसार, धुळे जिल्ह्यातील शिरपूर तालुक्याच्या सावळदे जवळील एस व्ही के एसच्या निम्स कॉलेजमधील विद्यार्थ्याने आत्महत्या केली आहे. कॉलेजच्या परिसरात विद्यार्थ्यांना राहण्यासाठी हॉस्टेलची सोय आहे. या हॉस्टेलमध्ये गळफास घेत या विद्यार्थ्याने स्वत:चा जीव घेतला. आत्महत्येमागील कारण अद्याप अस्पष्ट आहे.

काॅलेजच्या हॉस्टेलमध्ये आत्महत्या करणाऱ्या इंजिनियरिंगच्या विद्यार्थ्याचे नाव अथर्व राजपुरोहित असे आहे. तो निम्स येथे कॉम्प्युटर इंजिनियरिंगचे शिक्षण घेत होता. अथर्व राजपुरोहित हा मूळचा मध्यप्रदेश राज्यातील खरगोन येथील रहिवासी आहे. या घटनेनंतर घटनास्थळी पोहोचून शिरपूर पोलिसांनी तपास करायला सुरुवात केली आहे.

धुळे जिल्ह्यातील सावळदे जवळील एस व्ही के एमच्या निम्स कॉलेजमधील विद्यार्थ्याने आत्महत्या केल्याचे वृत्त समोर आले आहे. त्याने हॉस्टेलमध्ये गळफास घेत आत्महत्या केली. या विद्यार्थ्याने आत्महत्या का केली याचे कारण अजूनही समोर आलेले नाही. या घटनेमुळे कॉलेजच्या विद्यार्थ्यांमध्ये भीतीचे वातावरण निर्माण झाले आहे.

एस व्ही के एमच्या निम्स कॉलेजचे आवाहन -

NMIMS शिरपूर येथील एका विद्यार्थ्याच्या निधनामुळे आम्ही अतिशय दुःखी आहोत. या कठीण काळात आमच्या संवेदना त्याच्या कुटुंबीय, मित्रपरिवार आणि सर्व संबंधित व्यक्तींना व्यक्त करतो. या घटनेच्या संदर्भात काही अफवा आणि निराधार दावे पसरत असल्याची आम्हाला जाणीव आहे. मात्र, या क्षणी सर्वांत महत्त्वाचे म्हणजे आपण दिवंगत विद्यार्थ्याच्या प्रतिष्ठेला कुठलाही धक्का लागू न देता अत्यंत जबाबदारीने वागणे. आम्ही या प्रकरणाची गांभीर्याने आणि तत्परतेने दखल घेतली आहे. NMIMS चे नेतृत्व त्वरित सक्रिय झाले असून आज सकाळी शिरपूरकडे रवाना झाले आहे. या प्रकरणातील सर्व तथ्यांची चौकशी करण्यासाठी अंतर्गत तपास सुरू करण्यात आला आहे. तसेच, मूळ कारण ओळखण्यासाठी आम्ही संबंधित कायदा अंमलबजावणी यंत्रणांशी जवळून समन्वय साधत आहोत.