मुंबई महापालिकेच्या निवडणुकीत एकनाथ शिंदेंच्या शिवसेनेचे २९ नगरसेवक जिंकले आहेत. महापालिकेच्या निकालानंतर शिंदेंच्या नगरसेवकांना फाईव्ह स्टार हॉटेलमध्ये मुक्कामासाठी ठेवण्यात आलं आहे. सत्तासमीकरण मजबूत ठेवण्यासाठी फाईव्ह स्टार हॉटेलमध्ये मुक्कामासाठी ठेवण्यात आल्याचे शिंदे गटाकडून सांगण्यात आलं आहे. संभाव्य फुट टाळण्यासाठी आणि पक्षशिस्त कायम राखण्यासाठी हा शिंदेंनी निर्णय घेतल्याची चर्चा आहे. या नगरसेवकांशी उपमुख्यमंत्री एकनाथ शिंदे हे थेट संवाद साधणार आहेत. या बैठकीत महापौर निवड, मतदानाची रणनीती आणि पुढील राजकीय दिशा यावर चर्चा होण्याची शक्यता व्यक्त केली जात आहे. या हालचालींमुळे महापौर निवडीआधीच राजकीय वातावरण तापलं आहे. विरोधकांनीही या घडामोडींवर लक्ष केंद्रित केलं आहे.