मुंबई महापालिका निवडणुकीच्या पार्श्वभूमीवर वर्षा बंगल्यावर महायुतीची तब्बल दोन तास बैठक पार पडली. या बैठकीपूर्वी मुख्यमंत्री देवेंद्र फडणवीस यांनी आपल्या प्रमुख नेत्यांसोबत स्वतंत्र बैठक घेत पालिका निवडणुकांचा आढावा घेतला. या बैठकीत प्रामुख्याने मुंबई महापालिकेवर सविस्तर चर्चा झाल्याची माहिती सूत्रांनी दिली आहे.

सूत्रांच्या माहितीनुसार, मुंबई महापालिकेतील 227 जागांपैकी सुमारे 150 जागांवर महायुतीत एकमत झाले आहे. उर्वरित 77 जागांबाबत काल सविस्तर चर्चा करण्यात आली. या चर्चेत जवळपास 30 ते 35 जागांचा तिढा सुटला असून उरलेल्या जागांबाबत लवकरच आणखी एक बैठक घेऊन निर्णय घेण्याचे ठरल्याचे सूत्रांकडून सांगण्यात आले आहे. महायुतीकडून लवकरच जागावाटपावर अंतिम शिक्कामोर्तब होण्याची शक्यता असून मुंबई महापालिका निवडणुकीच्या दृष्टीने ही बैठक अत्यंत महत्त्वाची मानली जात आहे.