युद्धाच्या भीषण आगीत होरपळत असणाऱ्या इराणवर आता निसर्गही कोपला आहे. इराणमधील 'गेराश' भागात ४.३ रिश्टर स्केल तीव्रतेचा भूकंप झाला असल्याची माहिती अमेरिकन भूवैज्ञानिक सर्वेक्षणाने दिली आहे. या भूकंपाचा केंद्रबिंदू १० किलोमीटर जमिनीखाली होता. हा भाग दक्षिण इराणमधील महत्वाचे ऊर्जा प्रकल्प, बंदर आणि लष्करी तळांना जोडणाऱ्या एका महत्त्वाच्या कॉरिडॉरवर स्थित आहे. गचीन युरेनियम खाण या ठिकाणापासून साधारण १५०-१८० किलोमीटर अंतरावर आहे. ही इराणच्या युरेनियम स्त्रोतांपैकी एक महत्त्वाची खाण आहे. इराणचा 'बुशहर' हा अणुऊर्जा प्रकल्प देखील गेराशपासून २५०-३०० किलोमीटर अंतरावर नेऋत्तेला आहे. सुदैवाने या भूकंपामुळे अणुकेंद्रांचे नुकसान झाल्याची किंवा किरणोत्सर्गाची कोणतीही अधिकृत माहिती अद्याप समोर आलेली नाहीये. महत्वाचे म्हणजे दक्षिण इराणचा हा भाग, झाग्रोस पर्वतरांगांशी जोडलेला भाग, येथे जमिनीखालील क्षेपणास्त्र साठवणूक आणि प्रक्षेपण केंद्रे आहेत.