पुण्यामध्ये काल (25 जुलै रोजी) मुसळधार पावसाने तुफान बॅटिंग केली. अनेक सखल भागात पाणी साचलं होतं. नदी- नाले तुडुंब भरुन वाहू लागले. मुसळधार पावसामुळे नदीला पूर आला आणि या पुराचा फटका मोठ्या प्रमाणात नागरिकांना बसल्याचं पाहायला मिळालं. नागरिकांच्या घरात गुडघाभर पाणी साचलं होतं. तेच पाणी बाहेर काढण्याचं काम सध्या सुरु आहे. पुराचं पाणी घरात शिरल्यानं नागरिकांचं मोठं नुकसान झालं आहे. आज देखील पुण्याला रेड अलर्ट जारी करण्यात आला आहे. आज मुसळधार पाऊस होण्याची शक्यता हवामान खात्याने वर्तवली आहे. त्याची खबरदारी म्हणून प्रशासनाने पुण्यातील शाळांना सुट्टी जाहीर केलीये.