Andheri Ganpati festival: अवघ्या दोन दिवसांवर गणेशोत्सव आला असून गणेश मंडळाकडून तयारी देखील जवळपास पूर्ण झाली आहे. मुंबईच्या अंधेरी पश्चिमेकडील आझाद नगर सार्वजनिक उत्सव समितीच्या वतीने गणेशोत्सव साजरा केला जात आहे. नवसाला पावणारा अंधेरीचा राजा हा यंदा राजस्थान येथील पाटवा हवेलीत विराजमान होणार आहे. मंडळाचे यंदाचे हे 59 वे वर्ष आहे. मंडळानं गणेश भक्तांना दर्शनासाठी एक ड्रेस कोड जारी केलाय. यामुळे वाद देखील होण्याची शक्यता आहे. हाफ पँट आणि शॉर्ट स्कर्ट परिधान करून येणाऱ्या भाविकांना अंधेरीचा राजा पाहण्यासाठी प्रवेश मिळणार नसल्याचं मंडळाकडून सांगण्यात आलंय. हाफ पँट आणि स्कर्ट परिधान करून येणार्‍या महिला व पुरुषांसाठी येथे लुंगी आणि फुल पँटही ठेवण्यात येणार आहे. हे कपडे परिधान करून भाविकांना बाप्पाचे दर्शन घेता येईल. हा नियम 15 वर्षांपूर्वी लागू करण्यात आला असून, तो दरवर्षी पाळला जात असल्याचं मंडळाच्या पदाधिकाऱ्यांनी सांगितलंय.