सांगलीमध्ये काल रात्री शिवप्रतिष्ठानचे संस्थापक संभाजी भिडे गुरुजी यांच्यावर रात्री कुत्र्याने हल्ला केला होता. ज्या माळी गल्लीत कुत्र्याकडून भिडे गुरुजींवर हल्ला झाला त्या गल्लीत महापालिकेकडून कुत्री पकडण्याची मोहीम सुरू करण्यात आली आहे. सांगली महापालिकेच्या डॉग व्हॅन पथकाकडून ही मोहीम सुरू झाली आहे. तसेच कुत्र्यांची नसबंदी देखील करण्यात येणार असल्याचे महापालिकेकडून सांगण्यात आले आहे. संभाजी भिडे गुरुजींवर कुत्र्याने हल्ला करत पायाचा चावा घेतला. सांगली शहरातील माळी गल्ली या ठिकाणी हा प्रकार घडला असून भिडे गुरुजींवर शासकीय रुग्णालयात उपचार करण्यासाठी दाखल करण्यात आले होते. मात्र आता त्यांची प्रकृती उत्तम असल्याचे सांगितले आहे.