बंगालच्या उपसागरात निर्माण झालेल्या ‘डीप डिप्रेशन’ची तीव्रता वाढली असून, हे हवामान प्रणाली पश्चिम-वायव्य दिशेने सरकत आहे. हवामान विभागाच्या अंदाजानुसार, आज रात्री उत्तर आंध्र प्रदेश आणि दक्षिण ओडिशाच्या किनारपट्टीवर हे धडकण्याची शक्यता आहे. त्यामुळे ओडिशा आणि आंध्र प्रदेशातील अनेक भागांत मुसळधार पावसासह जोरदार वारे वाहण्याची शक्यता आहे.

या हवामान प्रणालीचा परिणाम महाराष्ट्रातील काही भागांवरही होण्याची शक्यता आहे. विशेषतः विदर्भात २३ ते २६ सप्टेंबरदरम्यान मुसळधार पावसाचा अंदाज वर्तवण्यात आला आहे. काही ठिकाणी जोरदार सरी आणि वादळी हवामानाची परिस्थिती निर्माण होऊ शकते. दरम्यान, नागरिकांनी स्थानिक हवामान विभागाच्या सूचनांकडे लक्ष देण्याचे आवाहन करण्यात आले आहे. शेतकऱ्यांनीही पावसाचा अंदाज लक्षात घेऊन शेतीची कामे आणि काढणीचे नियोजन करण्याचे आवाहन करण्यात आले आहे.