मुंबईतील गिरगाव चौपाटी आणि पुणे येथे गणेश विसर्जनाचा उत्साह शिगेला पोहोचलेला आहे. गिरगावच्या समुद्रकिनारी एकीकडे अरबी समुद्राची लाटं आणि दुसरीकडे भक्तांचा सागर असं अद्भुत दृश्य पाहायला मिळत आहे. भव्य मूर्ती, आकर्षक देखावे आणि मिरवणुकांमुळे संपूर्ण चौपाटी गजबजलेली आहे. दिवसभर रिमझिम पावसाची साथ असूनही गणेशभक्तांच्या आनंदात कोणतीही कमी न होता उलट तो अधिक दुणावला आहे.

दरम्यान पुण्यात, दगडूशेठ हलवाई गणपतीची आरती पुणे पोलिसांच्या वतीने करण्यात येत आहे. मानाच्या पाच गणपतींचे विसर्जन झाल्यानंतर सर्वांचे लक्ष दगडूशेठच्या रथ मिरवणुकीकडे वळते. ही भव्य मिरवणूक पुणेकरांसाठी नेहमीच आकर्षण ठरते, तर संध्याकाळी उजळणारी विद्युतरोषणाई या सोहळ्याची शोभा अधिकच वाढवते. मुंबई आणि पुणे या दोन्ही ठिकाणी विसर्जनाची संपूर्ण प्रक्रिया अत्यंत शिस्तबद्ध आणि सुनियोजित पद्धतीने सुरू आहे.