नाशिक : समृद्धी महामार्गाचं काही भागात काम अपुरे आहे. त्यामुळे हा महामार्ग पूर्णपणे खुला झालेला नाही. सप्टेंबर महिन्याच्या अगोदर मार्ग काढून एका पुलाचा वापर करून महामार्ग सुरु करण्याचा प्रयत्न आहे. डिसेंबरपर्यंत पूर्ण क्षमतेने समृद्धी महामार्ग सुरु होईल, अशी माहिती मंत्री दादा भुसे यांनी दिली.

नाशिक-मुंबई महामार्गावरील खड्ड्यावर भाष्य करताना दादा भुसे म्हणाले, 'मुख्यमंत्री एकनाथ शिंदे यांच्या उपस्थितीत बैठक झाली. त्यांनी देखील महामार्गाची पाहणी केली. महामार्गाची बऱ्यापैकी कामे झालेली आहे. रस्त्याची दुरुस्ती झालेली आहे, नवीन तंत्रज्ञानाचा वापर करून खड्डे बुजवले जात आहेत. काही प्रमाणात वाहतूक देखील सुरळीत झाली आहे. कामाची जलद गतीने प्रगती सुरू आहे. लोकांना त्रास होऊ नये या उद्देशाने काम सुरू आहे. त्याचा रिझल्ट दिसून येतोय, असे मंत्री भुसे पुढे म्हणाले.