अभिजीत सोनवणे, साम टीव्ही

उपमुख्यमंत्री अजित पवार यांचा विमान अपघातात मृत्यू झाल्यानंतर संबंधित विमान कंपनीच्या उड्डाणांवर बंदी घालण्याची मागणी होत आहे. तसेच या कंपनीवर सदोष मनुष्यवधाचा गुन्हा दाखल करण्यात यावा, अशीही मागणी विरोधकांकडून होत आहे. व्हीएसआर कंपनीच्या विमानांचा शिंदेसेनेच्या नेत्यांनीही धसका घेतला आहे. या विमानांतून प्रवास न करण्याचा निर्णय एकनाथ शिंदेंच्या नेत्यानं घेतल्याचे सांगितले जात आहे. या VSR विमान कंपनीच्या सेवेवर शंका उपस्थित केली जात आहे. पण दुसरीकडे, सत्ताधारी पक्षांतील प्रमुख नेते अजूनही याच कंपनीच्या विमानाने प्रवास करत असल्याचे समोर आले आहे. मुख्यमंत्री देवेंद्र फडणवीस यांच्यासह सुनेत्रा पवार, मंत्री छगन भुजबळ यांनी याच व्हीएसआर कंपनीच्या विमानाने मुंबई ते नाशिक प्रवास केला.

नाशिकमध्ये मराठी भाषा गौरव दिनानिमित्त विश्व मराठी संमेलनाचे आयोजन केले आहे. याच कार्यक्रमाला फडणवीस यांनी हजेरी लावली. मुंबईवरून ते थेट विमानाने नाशिकला दाखल झाले. मात्र ज्या विमानाने त्यांनी प्रवास केला ते VSR कंपनीचे असल्याने चर्चांना उधाण आले. सरकारने VSR कंपनीला क्लीन चीट दिली का? असा प्रश्न यानिमित्तानं उपस्थित होत आहे. फडणवीस यांच्यासोबत सुनेत्रा पवार, मंत्री छगन भुजबळ हे देखील नाशिकमध्ये आल्याचे सांगितले जात आहे.