दिल्लीतील जंतर मंतरवर यशस्वीरीत्या पार पडलेल्या विद्यार्थ्यांच्या आंदोलनानंतर CJP जगभरात चर्चेचा विषय बनला आहे. एका तरुणाने विद्यार्थ्यांचा आवाज बनून उचलेल पाऊल देशाच्या राजकारणात सुद्धा वादळ आणेल याची कोणालाही कल्पना नव्हती. दरम्यान आता हेच वादळ राजकारणात उतरणार का? याबाबत चर्चा सुरु आहेत. CJP चे संस्थापक अभिजित दिपके आणि त्यांच्या कोअर कमिटीची आज संभाजीनगरमध्ये महत्त्वपूर्ण बैठक होत आहे. या आंदोलनाची पुढील रणनीती आणि CJP ची भविष्यातील दिशा निश्चित करण्यासाठी ही बैठक दीपके यांच्या घरी आयोजित करण्यात आली आहे. बैठकीसाठी सौरभ दास यांच्यासह CJPचे प्रमुख सहकारी संभाजीनगरमध्ये दाखल झाले आहे. या बैठकीत आंदोलनाची आगामी भूमिका, संघटनेची ध्येय-धोरणे आणि पुढील कृती आराखड्यावर सविस्तर चर्चा होणार असल्याची माहिती मिळत आहे. या बैठकीपूर्वी दिपके यांनी घेतलेल्या पत्रकार परिषदेत त्यांनी राजकारणात उतरण्याबाबत आपली भूमिका स्पष्ट केली आहे. दिपके मी म्हणाले, CJP ही सरकारविरोधात पब्लिक प्रेशर ग्रुप म्हणून काम करेल. दरम्यान, स्वतंत्र राजकीय पक्ष स्थापन करण्याच्या चर्चांवर दीपके यांनी अद्याप कोणतीही अधिकृत घोषणा केलेली नाही. तसेच हा पर्याय त्यांनी स्पष्टपणे नाकारलेलाही नाही.