शहराच्या वाहतूक यंत्रणेचा उडालेला फज्जा लक्षात घेता मंत्री छगन भुजबळ यांनी शनिवारी सकाळी अचानक नाशिकची द्वारका चौफुली गाठली. या चौकातील अतिक्रमण हटविण्यासंदर्भात वाहतूक पोलिस आणि महापालिका अधिकाऱ्यांनी यासाठी एकमेकांकडे बोट दाखवल्याने संतापलेल्या भुजबळांनी अधिकाऱ्यांना चांगलेच धारेवर धरले. मला शिकवू नका, मी मुंबई महापालिकेसह गृहखातेही सांभाळले आहे. काम करून कोंढी सोडवा नाही तर मला कामाला लागावे लागेल असा सज्जड दम अधिकऱ्यांना भरला.

त्यानंतर आज नाशिक महापालिका प्रशासनाने द्वारका चौकात अतिक्रमण मोहीम राबवली. या दरम्यान मोठा पोलिस बंदोबस्त तैनात करण्यात आला होता. नाशिक शहराचा द्वारका चौक हा मुख्य रस्ता आहे. मागच्या अनेक वर्षांपासून या द्वारका चौकात मोठ्या प्रमाणात वाहतूक कोंढी असते. यामुळे नाशिकरांना मोठ्या वाहतुकीचा सामना करावा लागतो. यानंतर काल मंत्री छगन भुजबळ यांनी या ठिकाणी जाऊन अधिकाऱ्यांना फैलावर घेतले आणि आज या द्वारका चौकात अतिक्रमण मोहीम राबवण्यात आली.