लक्ष्मण हाके यांनी ओबीसी आरक्षण बचावासाठी उपोषणाचं हत्यार उपसलं. दहाव्या दिवशी सरकारच्या शिष्टमंडळानं आश्वासने दिल्यानंतर हाके यांनी उपोषण तात्पुरते स्थगित करण्याचा निर्णय जाहीर केला. तत्पूर्वी सरकारच्या शिष्टमंडळात सहभागी असलेले छगन भुजबळ यांनी हाके यांच्याशी चर्चा केली. त्यानंतर उपस्थितांना संबोधित केले. लक्ष्मण हाकेंच्या उपोषणस्थळावरून भुजबळ यांनी मराठा आरक्षण आंदोलनाचे नेते मनोज जरांगे यांना टोला लगावला.

आम्ही कुणाला घाबरत नाही, कुणाला धमक्याही देत नाही, असा टोला छगन भुजबळ यांनी मनोज जरांगे यांना नाव न घेता लगावला. ओबीसी समाजानं एकत्र राहावं, यापुढं तुम्ही सर्व एकत्र राहिले तर, आरक्षण टिकेल, असंही ते म्हणाले.