मंत्रिमंडळात स्थान न मिळाल्याने नाराज असलेले भुजबळ हे अजूनही वेट अँड वॉचच्या भूमिकेत आहेत. त्यानंतर आज भुजबळ मुंबईत दाखल झाले असून पुढील दोन दिवस ते मुंबईत असल्याचं सूत्रांकडून सांगण्यात आलं आहे. या दोन दिवसात ते देशभरातील ओबीसी समाजाच्या नेत्याना भेटणार आहेत.

महायुतीचा मंत्रिमंडळाचा विस्तार काही दिवसांपूर्वीच झाला आहे. मंत्रिमंडळ विस्तार आणि खाते वाटपावरून महायुतीत नाराजी नाट्य बघायला मिळालं आहे. त्यानंतर मंत्रिमंडळ विस्तारात अनेक जुन्या दिग्गज नेत्यांचा पत्ता कट झाल्याचं बघायला मिळालं. यात राष्ट्रवादी अजित पवार गटाचे छगन भुजबळ यांना देखील मंत्रिपदापासून दूर ठेवण्यात आलं. त्यानंतर छानग भुजबळ यांनी आपली नाराजी जाहीरपणे बोलून देखील दाखवली आहे. तसंच अजित पवार यांची साथ सोडण्याबद्दलचे अनेक सूचक वक्तव्य देखील याकाळात भुजबळ यांनी केले. त्यामुळे ते काय भूमिका घेतील याकडे सगळ्यांचं लक्ष लागलेलं असतानाच आता भुजबळ हे पुढील 2 ते 3 दिवसांसाठी मुंबईत असून या काळात ते सर्व ओबीसी नेत्यांची भेट घेणार आहेत. त्यासाठी सर्व ओबीसी नेते देखील आता मुंबईत दाखल झाले असल्याचं सांगण्यात आलं आहे. या भेटीगाठीत भुजबळ सर्व ओबीसी नेत्यांशी चर्चा करून आपली पुढील भूमिका ठरवणार असल्याचं सूत्रांकडून सांगण्यात येत आहे. सध्या तरी छगन भुजबळ यांनी या सर्व प्रकरणावर प्रसिद्धीमाध्यमांना प्रतिक्रिया देण्यास नकार दिल्याचं दिसत आहे.